બાકી બરાબર છે.

જગતને એકલા જોવું પડ્યું,બાકી બરાબર છે,
તમારા થઇ જવું બાકી રહ્યું,બાકી બરાબર છે.

હવા ને હાલ કહેતાં ડાળને ડૂમો ભરાયો છે,
હતું જે પાંદ પ્પારું એ ખર્યું,બાકી બરાબર છે.

નવાજૂની નગરની ખાસ ન્હોતી પણ અહીં એક જણ,
વધુ પડતાં ઉમળકાથી મર્યું,બાકી બરાબર છે.

જે હંગામી હતો સંગાથ એનું દુખ રહ્યું કાયમ,
મને કોઇ ભૂલવું ભૂલી ગયું,બાકી બરાબર છે.

ગયો ટૂકાં હું રસ્તે ને સફળતા ઘેર પણ આવી,
પછી વળગણ એ રસ્તાનું નડ્યું,બાકી બરાબર છે.

વસંતે દ્વાર ખખડાવ્યા હતાં એ વાત સાચી, પણ,
મને ઘર ખોલતાં મોડું થયું,બાકી બરાબર છે.

~ગૌરાંગ ઠાકર